Gasteiz. Mugikortasunaren Europako Astea

Mugikortasunaren Europako Astea urtero irailaren 16tik 22ra ospatzen da, eta Europako Batzordearen hiri-mugikortasun iraunkorraren inguruko sentsibilizazio-kanpaina nagusia da. Ohikoa den moduan, Autorik Gabeko Eguna egingo da hilaren 22an, ostiralean. Egun horretan, tranbia bidezko eta TUVISA sareko garraio publikoa doakoa izango da eta taxi sektoreak beherapen-txartelak emango dizkie joan-etorriak egiteko taxia erabiltzen duten bezero guztiei.

Aurtengo edizioan, 2023an, "Konbinatu eta mugitu!" da kanpainaren leloa, eta gaia "Eraginkortasun energetikoa". Helburua da sentsibilizatzea autoaren erabilera neurrigabeak hirian dituen ondorio negatiboez, bai osasun publikoan, bai ingurumenean, eta ikusaraztea zer onura dituen garraiobide jasangarriagoak erabiltzeak, hala nola garraio publikoa, bizikleta eta oinezko joan-etorriak.